ටෙලිකොම් නිසඳැස්

අහසේ තැනූ ස්කයි නෙට්වර්ක්...

2011-10-04T07:04:00.000-07:00

1.රජය විසින් මහින්ද රාජපක්ෂ ජනාධිපතිතුමාගේ නංගීගේ පුතාට වයි මැක්ස් සඳහා විදුලි සංදේශ නියාමන කොමිසම හරහා අවසර පතක් නිකුත් කරයි..
2.ඉන්පසු මිලියන සිය ගනනක් වියදම් කොට ටෙලිකොම් ආයතනය විසින් එම වයි මැක්ස් සඳහා වන අවසරය මිලදී ගනී..
3.වසර ගනනක් තැටමීමෙන් පසු සහ මාස්පතා 1 හි සඳහන් අයිතිකරුට මිලියන ගනනින් ගෙවමින් සිට ස්කයි නෙට්වර්ක් සිය සේවා පාරිභෝගිකයින්ට සපයයි..
4.වැරදි සහ බාල තත්වයේ උපකරණ ගෙන ඒම නිසා ස්කයි නෙට්වර්ක් ආයතනයට සිට සේවා විකුනා ගත නොහැකි වෙයි..
5. මුල සිට අග දක්වා වූ අංක 1 හි සඳහන් පුද්ගලයාගේ සහ නිලධාරින්ගේ ක්‍රියාකලාපය හේතුවෙන්,, මිලියන සිය ගනනක් මුදල් දී රැගෙන විත් ඇති උපකරන වැඩ කරන්නේ නැති උවත් ඒ සඳහා වෙන සියලු මුදල් ගෙවාදමනු ලබන්නේ ටෙලිකොම් ආයතනය මගිනි..
6.දැනට විස්සකටත් අඩු සේවක ප්‍රමාණයක් සහිතව සියයක්වත් නැති පාරිබෝගියකයන් පිරිසක් පිරිවරා ටෙලිකොම් ආයතනය පසුපස එල්ලී මැරුන වවුලෙකු ලෙස තවමත් ස්කයි නෙට් පවතී.
නිසියාකාර පරීක්ෂණයකින් තොරව මිලදී ගෙන සහ එහෙත් දැනට මිලදී ගෙැන ඇති නොගැලපෙන උපාංග රැසක් දිරාපත් වෙද්දී සහ...
ඒ වෙනුවෙන් ගෙවන ලද මුදල් විශාල ප්‍රමාණයක් අපතේ යද්දී..
තවමත් ඒ සම්බන්ධ වැරදිකරුවන් නොමැත..ඉදිරියටත් නොමැති වෙනු ඇත...
එකම රටක් එකම හඬක් මෙහෙම කෑමක්....

ස්තූතියි...

2011-08-19T10:00:00.000-07:00

අපගේ ඒ සටන අවසාන විය..

පහලොස්දාහකට අඩු මිසක් වැඩි නොවන අපගේ මුලු වැටුප සියයට දහයකින්ද...

ස්ථිර කිරීම සම්බන්ධයෙන් සාකච්චා කිරීමට හා අධ්‍යනය කිරීමට ස්වාධින කමිටුවක් පත්වීමෙන්ද...

සති අන්ත අතිකාල දීමනා දෙගුණ වීමෙන්ද..

රියදුරු මහතුන්ගේ සේවා කාලය පැය බාගයකින් අඩු වීමෙන්ද..

පසු අපේ සටන අවසාන විය..

අප ආයතනය තරඟකාරි වෙළඳපොල වටපිටාවක පවතින බව අප දනිමු..එහෙත් අසාධාරන ලෙස කරන වහල් මෙහෙය නතරකර සාධාරන වැටුපක් ගෙවන ලෙස හා වෘත්තීය සුරක්ෂිත තාවය පිණිස අප විසින් වෘත්තිය සටන් ආරම්භ කරන ලදී..ශ්‍රී ලංකා ටෙලිකොම් මෑන්පවර් සහ සේවක මහතුන් අත්සන් කර ඇති ගිවිසුමේ( සේවකයින් සහ මෑන්පවර් ආයතනය) කිසිදු විනය පරීක්ෂණයක් නොපවත්වාම සේවයෙන් පහ කරනු ලැබීමක් අපහට සිදුකල හැකි වුවත් කිසිදු සේවකයෙකුගේ සේවය අත් නොහිටවන තැනට සියලු වෘත්තිය සමිති වගබලාගන්නා ලදී..

සමහර වෘත්තිය සමිති විසින් අපගේ මෙම ඇතුලත්වීම ප්‍රතික්ෂේප කලත් අපවත් ආයතනෙයේ ම පිරිසක් ලෙස කල්පනා කල අපේ වෘත්තිය සමිතිවලට ප්‍රණාමය හිමි කරමු..

අපට ආයතනය ඇනහිටවීමේ කිසිදු වක්‍ර හෝ බලාපොරොත්තුවක් නොවීය..සාමාන්‍යෙයන් මෙවැනි ප්‍රකට ආයතන මෙවැනි දින ගනන් වර්ජන වලට එලඹෙන්නේ නැත...එහෙත් දිගින් දිගට වූ විසඳුම් නොලැබීම අප මෙතාක් දිග වර්ජනයකට යොමුකරන ලදී..සියල්ල බොරුවෙන් චාටුවෙන් සහ නීති රීති වලින් යටපත් කල හැකි යයි සිතූ සමහර අයට රිදෙන්නට ඇත එහෙත් අප කිසිවක් හමුවේ නොසැලුන බව කීමට කැමැත්තෙමු..

ස්තූතියි...

අපිත් අද ලෙඩ නිවාඩු..

2011-08-01T20:09:00.000-07:00

ටෙලිකොම් කියා ජනප්‍රිය ආයතනයක් ඇත.එහි වර්ථමාන ආදර්ශ පාඨය එකම රටක් එකම හඬක් යන්නය.අපි අද ඒ ආයතනය ට විරුද්ධව ලෙඩ නිවාඩු දමා වැඩ වර්ජනය කරමු.අපනම් එස් එල් ටී මෑන්පවර් සේවක පිරිසයි.මෑන්පවර් ක්‍රමයට බඳවාගන්නා ලද සේවකයින් 2000ක් පමණ දැනට ටෙලිකොම් ආයතනයට සෘජුවම බැදී සේවය කරයි.2008 ජූලි මස පිහිටුවන ලද මෑන්පවර් සොලියුෂන් ආයතනය හරහා දැන් අවුරුදු 3ක් තිස්සේ කිසිදු වෘත්තීය අයිතිවාසිකම්ක් ලබා දී අපවෙතින් ලබාගන්නා ලබන වහල් සේවයට එරෙහිව අප දැන් ටෙලිකොම් සේවකයින් සමග එකතුව වෘත්තීය සටන් ආරම්භ කොට ඇත.

*අප මෑන්පවර් සේවක මහතෙකුගේ සාමාන්‍ය අතිකාල දීමනාව පැයක් සදහා රුපියල් 100කට අඩු අගයක් ගන්නා අතර ඒ හා සමාන්තර ටෙලිකොම් ස්ථිර සේවකයින්ගේ එම අතිකාල අගය රුපියල් 200ට 300ටවඩා වැඩි වෙයි.එයින්ම කෙතරම් වැටුප් පරතරයක් අප අතර ඇතිදැයි පෙනෙනු ඇත

*.සාමාන්‍යෙයන් සමාන්තර ටෙලිකොම් සේවකයින් බොහෝ දෙනාගේ මූලික වැටුප් රුපියල් විසිපන්දහසකට වැඩි වන අතර අපගේ මූලික වැටුප රුපියල් 12500කට වඩා අඩු අගයක් ගනී.

*2008 අගෝස්තු මස අත්සන් කරන ලද ගිවිසුම් ප්‍රකාරව එකග වීඇති සොච්චම් පඩියට අප තවමත් වැඩ කරන අතර ඉන්පසු ඇතිවූ කිසුදු වෙනසක් මෑණ්පවර් ආයතනය මගින් සලකා බලා නැත.

*පඩි ආදි අනෙකුත් දේ වෙනස් කිරිමට සිදුවන නිසා සියලු මෑන්පවර් සේවකයින්ගේ කොන්තරත් සේවා කාල මාස 3න් 6න් සහ මාස 2න් ආදි වැඩිකල බවට ලියුම් එවනවා විනා කිසිදු අයුරකින් අපගේ කොන්තරත් ගිවිසුම අලුත් වීම මෙතාක් සිදු වී නැත.

*සාමාන්‍යෙයන් ආයතනයක සේවකයින් කොන්ත්‍රාක් පදනම මත තබාගත හැකි කාලයක් පවතින අතර සේවා ස්ථානය වගකීම් සහ පැවරීම් එලෙසම තිබියදී..තවදුරත් අප කොන්ත්‍රාක් පදනම මතම නැවත බදවාගැනීමේ පටිපාටියක් මෑන්පවර් ආයතනය මගින් සිදුකරයි.

*පවතින ක්‍රමය අනුව කුමන අංශයක කෙසේ ටෙලිකොම් ආයතනය වෙනුවෙන් මැන්පවර් සේවකයින් ක්‍රියා කලත් ඔවුන්ට කිසිදු කාර්යාලිය පුටුවක් මේසයක් වත් ලැබෙන්නේ නැත.කොට්න්ම පාර්බෝගික සේවා නිලදාරින් ලෙස පත්වීම් ලබන මෑන්පවර් සේවකයින් පවා වසර ගානක් එකතැන සිටියත් මේස පුටු,කොම්පියුටර ආදිය ඉල්ලාගෙන වැඩ කල යුතු වෙයි.

*බොහෝ මේසන් බාස් ගෝලයින් වැඩකරන කුඩා ඉදිකිරීම් සේවකයන් වැඩ කරන ආයතනවල පවා සේවකයින්ට ජංගම දුරකතන ලබාදීම් හෝ සිම්පත් ලබාදීම් බිල් ගෙවීම් සිදු කෙරුනත් කෙලින්ම ටෙලිකොම් අනුබද්ධ අපිට කිසිදු ජංගම දුරකථන සබදතාවක් නොමෙලේ ලැබෙන්නේ නැත.එහෙත් ඇස් එම් ඇස් මගින් දැනුම් දීම් නම් සිදුවෙයි.

බිස්කට් කොම්පැණියක කලින් සිටි ප්‍රධාන මානව සම්පත් නිලධාරියෙකු දැනට සිටින ටෙලිකොම් ආයතනයේ සිටින අතර ඔහුට මේ දෑ පැහැදිලි කල යුතුව ඇත.

*බිස්කට් කොම්පැනියක නයිස් බිස්කට් උඩින් සීනි තවරන්නට ඕනෑම තැනකින් කොල්ලන් හොයාගන්නට පිලිවන් නමුත් මෙවන් ආයතනයක පුහුනු පලපුරුදු සේවකයින් සෙවීම අමාරුය.

*කොම්පැනීය බිස්කට් නොසෑදුවාය කියා මැනේජ්මන්ට් එකට අමාරු විය හැකිමුත් සාමාන්‍ය ජනතාවට ඒ බිස්කට් නැතිනම් වෙනත් බිස්කට් එකක් කා සිටිය හැක.නමුත් අප වැනි බැංකු,රෝහල්,අන්තරජාතික මධ්‍යස්ථානවලට දත්ත සපයන ආයතන දවසක් සෙමෙන් යෑම යනු එදින නොවුනත් පසුවට හෝ ආයතනික තත්වයට බාදාවකි.

*දිගින් දිගටම කිසිවක් නොලැබෙන තෘප්තිම්ත් නොමැති සේවකයින් විසින් බිස්කටි කොම්පැනියට සිදුකල හැකි ලොකුම හානිය මැසිමක් සිරකිරීම වන අතර..අප ආයතනයේ එක් ප්‍රකාශ සංදාම 2ක් කැපීමෙන් සිදුවන හානිය කෙතෙක්ද යන්න කෙනෙකුගෙන් අසා දැනගන්නා ලෙස ඉල්ලමි.

SLT Trade Union Actions

2011-07-06T16:45:00.000-07:00

*සේවක වැටුප් හා දීමනා වල පවතින අධික විෂමතාවය

*ආයතනික සේවක උසස්වීම් ගැටලු

*දූෂන වංචා නැවතීමේ පියවර නොගැනීම

*ටෙලිකොම් හිම මෑන්පවර් ආයතනයක් හරහා දැනට අවුරුදු 3ක් තිස්සේ සේවකයින් බඳවාගෙන කරනු ලබන අසාධාරන සූරාකෑමේ ක්‍රමවේදය

*අයහපත් පරිපාලනය තුලින් ආයතන ය දිනෙන් දින අගාධයටම යෑම

මේ වැනි කාරනා කීපයක් මුල් කරගෙන ටෙලිකොම් වෘත්තීය සමිති කීපයක් වෘත්තීය සමිති ක්‍රියාමාර්ග වලට එලඹෙන ලදී...මේතාක් මෑන්පවර් සේවකයින්ට තිබෙන විශාලම ගැටලු වන සේවක ස්ථාවරත්වය හා ලැබෙන අඩු වරප්‍රසාද,වැටුප් (13,500ක වැඩිම මූලික් වැටුප) මත කිසිවකුගේ පෞද්ගලික ආරාධනයෙකින් තොරවම මෑන්පවර් සේවකයෝද සතුටුදායක දායකත්වයක් ඒවෙත දක්වන ලදී..

දින දෙකක් කෑම පැය තුල පැවති උද්ඝෝෂන

සිකුරාදා (1) දින පැවත් වූ මූලස්ථාන වැඩ වර්ජනය

28 දින සිට පැවැත්වෙන අතිකාල වර්ජනය

ඊයේ (ජූලි 6) දැඩි මර්ධන හා බියගැන්වීම් අණකිරීම් මත පැවැත්වූ වැඩවර්ජනය හා උද්ඝෝෂනය

යන ක්‍රියාමාර්ග වලදී විශාල ප්‍රතිශතයක් මෑන්පවර් සේවකයින් විය...

...............................................................................................

දැනට කෙරෙන නව සබදතා ලබාදීම පිටත ආයතන සදහා කොන්තරත් ලබාදීම....

ගෙඩිපිටින් ව්‍යාපෘති පිට ආයතන වලට ලබාදීම...

විශාල ප්‍රමාණයේ මෘදුකාංග මානවසම්පත්,මූල්‍ය,තොරතුරු තාක්ශන,පරිපාලන ආදි ක්ශේත්‍ර වලට ඇතුලු කොට සේවකයින් කප්පාදු කල හැකි දැයි මැන බැලීම ...

ආදි දේ තුල ඉදිරියට ටෙලිකොම් සේවකයින් ගේ අනාගතය කෙතරම් සොදුරු වේදැයි අපට කීමට නොහැකි වනු ඇත..සොච්චමක් දී “දෙන්න පුලුවන් තරම තමයි දැන් ඉතින් යන්න කීවොත්“ එදාට ඒ ලැබෙන තුට්ටු දෙක නොලැබී යතැයි ද ලොක්කා මේ අවස්තාවේදි පවා අමනාප වීම අවාසි විය හැකි බැවින්ද ටෙලිකොම් බහුතර සේවකයෝ යතා පරිදි ම නිද්‍රාශීලි වනු ඇත...

එවන් දිනෙක උවත් නැතිවන්නට තරම් පඩියක්...දීමනා නැති මෙවන් රක්ශාවක් ගැන හීන මාලිග තැනීම පසෙක ලා,,, වෙන කරන්ට කිස්ත් නොමැති බැවින් මෑන්පවර් සේවකයින් ටෙලිකොම් සේවකයින් පසුපසම එනු ඇත..

ටෙලිකොම් පරිපාලනය විසින් මර්ධනය සදහා ක්‍රියාමාර්ග කීපයක් ගනු ලැබීය...

*සිකුරාදා වැඩ වර්ජනයට සහභාගී වුවන් ලයිස්තු ගත කිරීම..

*නිවේදන මගින් වැඩවැරුම නීතිවිරෝධි බව පැවසීම

*උසාවි නියෝගයක් හරහා ටෙලිකොම් ආයතන භූමිය තුල උද්ඝෝෂන පැවැත්වීම තහනම් කිරීම

*විශේෂ වැඩ පැවරීම් මීටින් කැදවීම පවත්වා සේවකයින් උද්ඝෝෂනයට සහබාගි වීම වැලැක් වීමට ක්‍රියා කිරීම

*නිලධාරින් ලවා සේවකයින් බිය වැද්දීමට ක්‍රියා කිරීම

*මෑන්පවර් සේවකයින්ට මේ සදහා ඇතුලත් වීමට නොහැකියැයි ප්‍රචාරය කිරීම..

මෙවන් දැඩි බිය වැද්දීම් හමුවේද දිනෙන් දින ආයතනය අගාධයට ගෙනයන මේ පරිපාලනයට එරෙහිව(පසුගිය වසර 5-6ක සිට ආයතනික ලාබයට කුමක් වීදැයි බලන්න) ගත් ක්‍රියාමාර්ග වලට පිරිසක් එකතු විය...

සාර්තක උද්ඝෝශන ව්‍යාපාරයක්ද පවත්වන ලදී...

එහෙත් එම පිරිස ටී ශර්ට් එකට කැප් එකට කුඩයට එල්ලේ ගහන්න යන,බොරුවට සෙල්ලම් කරන්න යන පිරිසට වඩා බෝ සෙයින් අඩු බව කිය යුතුයි...නිලධාරින් ලෙව කා ඉතිරි වන මස්කටු ටී ශර්ට් ලෙස, කැප් ලෙස, කුඩ ලෙස සේවකයින්ට විසිකරන විට කිසිදා දැක නැත් ඒවාට මෙන් මේ සේවකයෝ පොරකති..

එහෙත් මෙතෙක් කෑගසා ලබාගත් වැඩි වූ 500 වෙනුයෙන්වත් වූයේ ටෙලිකොම් සේවකයින් අතලොස්සකි...

අප ලබාගත් දේ

සමාන්තර ස්ථිර සේවකයින් මෙන් 2.5ක වැටුප් පරතරයක් සහිත (මූලික වැටුප) අප වැනි සේවකයින්,, ක්ලීනින් සර්විස් එකක, කැන්ටිමක වේටර කෙනෙකු මට්ටමට දමා කෙරෙන ගෙවීම් පටිපාටිය ගැන කිසිවක් හෝ කීමට රන්ජිත් රුබසිංහ මහතාට ඔහුගේ අදෝනා පත්‍රය ප්‍රමාණවත් නොවී ම.

සේවකයින්ට මාරුවීම් ලබාදීමට වෘත්තීය සටන් සදහා සහබාගි වීම සුදුසු කමක් වීම...

චක්‍ර ලේඛ ,ගිවිසුම්, ලියුම් මගින් කෙතෙක් දැන්වුවත් කිසිවක් ලබානොදී ටොපි හරහා මැන්පවර් සේවකයින් මුලා කල නොහැකි බව පරිපාලනයට ඒත්තු ගැන්වීම..

මෑන්පවර් හරහා කුනු කොල්ලයට සේවකයින් ගැනීමෙන් වෘත්තීය සටන් මර්ධනය වන බවට ඇති ප්‍රකට මතය පුස්සක් වීම..

අඩු වශයෙන් අපිත් ඉන්නවා හෝ කියා ගැනීමට අවැසි ප්‍රමාණවත් නියෝජනයක් ලබාගැනීම...මේ සටනෙන් මෙතෙක් ලැබූ අපිට අදාල ජයග්‍රහන වෙයි..

මහත්වරුන්ටත් කීමට යමක් ඇත...ලක්ස ගනන් ගෙන ඇස් කන් නොපෙනන උන්ලෙස සිටින ඔබ හා අප එකට සේවය කරන අය වන බැවින් අපගේ මල ද්‍රව්‍ය එකම තැනකට යනවා වන්නට පුලුවන..

එහෙත් ඔබත් අපත් ගත යුත් තේ එකම ආහාර බවත් ඒවාට එක්සකටිව්,මෑන්පවර් නන් එක්සකටිව් කියා මිල වෙනසක් නොමැති බවත් රුපියල් 13,500 හිගන වැටුප කෙසේ පවුලක ආහාර අවැසිතාවය වත් සපුරන්නේද යන බවත් මොහොතක් සිතන ලෙසයි...

ශ්‍රී ලංකා ටෙලිකොම් මෑන්පවර් සේවකයින්ට ජයවේවා...

මහින්දයා,,. පුත්‍රයා සහෝදරවරු සහ රජයටද...මෙවන් විපත් චිත්‍රපට් මෙන් බලාසිටින විපක්ශයටද...පුටුව මිස අවට නොබලන ටෙලිකොම් ඉංජිනේරු ගනකාධිකාරින්ටද හෙන වදින සේක්වා....

New Year

2011-04-09T22:05:00.000-07:00

අපි ට ාඅපිට

අද 11 අදනම් ගෙදර යන දවස ...හනේ මංද මේ සොච්චං පඩියෙන් මොනව කරන්නද කියල

අවුරුද්දට කියල මෑන්පවර් එකෙන් දීපු ඇඩ්වාන්ස් සල්ලි වලිං පහුගිය සතියෙ ගෙදර ගිය වෙලාවෙ ගෙදරට පුටු 6 කුයි මේස කෑල්ලකුයි ගත්ත. තියෙන ලී පුටු හොඳ මදි කියල තමයි මල්ලිගෙ අදහස උනේ “අක්කෙ මේ තමුසෙ හොඳ කොල්ලෙක් හොයල පැනල යනව ඕයි..ඔය හිඟන රස්සාවෙන් තමයි තමුසෙගෙ ජීවිතෙ නැතිකලේ...දැං බලනව අඩු තරමෙ ගෙදරට ප්ලාස්ටික් පුටු 6ක් ගන්නවත් තමුසෙට සල්ලි තියෙනවද? නෑ නෙ...“

තාත්තාද කොහේ හෝ ගොස් පැමිණි දිනෙක “මේ ලී පුටුවලට වැඩිය බොහොම සනීපයි නේ ප්ලාස්ටික් පුටු“ යැයි අම්මා සමඟ චැට් එකක් දමන අතරතුර පැවසුවාය.

මූලික වැටුප රුපියල් 9,500කි...කාර්යාල කාර්ය සහායක වැඩ කලත් තනතුරෙන් පාරිභෝගික සේවා නිලධාරිනියක වන මා හට ලැබෙන සියලු දීමනා එකතු කලත් රුපියල් 10,700 කට වඩා මුදලක් ලබාගත නොහැක. මන්ද මා වැඩකරන සේවා ස්ථානයේ වැඩ හරියට 5.00ට අවසාන වන නිසාවෙනි.ඉතිං සෙනසුරාදා ත් අපේ වැඩකරන දිනයක් වන බැවින් එදිනත් ලැබෙනුයේ බොහෝවිට අතිකාල පැය 2ක් වැනි ප්‍රමාණයකි..

අප මව් ආයතනය වන ශ්‍රී ලංකා ටෙලිකොම් ආයතනය ලැබූ ශුද්ධ ලාභය මේ වසරේදී රුපියල් බිලියන 5.7කි. එහෙත් එම වාර්ථාගත යැයි කියන ලාභය ලාභ බෙදීමක් ලෙස සාමාන්‍ය කොටස් හිමියන්ට තවම ලැබී නොමැත..එසේම ලාභ ලැබුවාය කියා ටෙලිකොම් ආයතනයේ ඇමතුම් හා දත්ත සේවා සඳහා වන ගාස්තු අනෙත් ජංගම දුරකථන සේවා සපයන ආයතනවල ගාස්තු තරම් අඩු වී නොමැත..එනම් තේරෙන භාෂාවෙන් කිවහොත් එම ලාබයෙන්,, මිලියන ගනනක් වන අහිංසක දුප්පත් ටෙලිකොම් පාරිභෝගිකයින්ට රාජ්‍ය විදුලි සංදේශ සැපයුම්කරු ලෙස කරඇති විශේෂ දෙයක් නොමැත..අපි සරල උදාහරණයක් ලෙස ගතහොත් නව අඩුකල ගාස්තු අනුව අමතර මෙගාබයිට් 10ක් සඳහා වන ගාස්තු ටෙලිකොම්හි රු 3.00ක් වන විට අප සහෝදර මොබිටෙල් හි එය රු 2.00 කි.

මේ අවුරුද්ද මුලදීත් දැන් සිංහල අවුරුදු සමය වන මේ කාලයේත් අපහට කිසිදු බෝනස් දීමනාවක් දීමට පරිපාලනය අසමත් වී ඇත..කෙනෙක් කියන හෝ සිතන ආකාරයට අපි වෙනත් ආයතනයකින් කුලියට ගත් ක්ලීනින් සර්විස් හෝ සිකුරිටි මට්ටමේ අයවලුන් වන බැවින් මව් ආයතනය ලාබ ලැබුවාට එහි වන මෑන්පවර් සේවකයින් වන අපිට ලාභ ලැබීමේ හිමිකමක් නැත..සිකුරිටි අයගේ සේවය ගේට්ටුව අසලදීත් ක්ලීනින් අයගේ සේවය කුනුබාල්දිය ළගිනුත් අවසන් වන නමුත් අපගේ සේවය අඬු විහිදු දැවැන්ත කකුලුවෙකු මෙන් ටෙලිකොම් ආයතනය පුරා පැතිර ගොස් ඇත..සංකල්පීයව සහ නීතියට අනුව මෑන්පවර් ෙස්වකයින් සියලු සේවකයින් එකවර ටෙලිකොම් ආයතනයෙන් ඉවත්කල හැකිමුත් ප්‍රායෝගිකව එය කල නොහැක්කේ තනතුරු කිහිපයක් යටතේ විශාල සේවක පිරිසක් මෑන්පවර් අංශයෙන් ටෙලිකොම් ආයතනය වෙනුවෙන් සේවය කරන නිසාය...සරල උදාහරණයක් ලෙස රියදුරු මහතෙකු ගමු..ඔහු ඉවත්කර වෙනත් සේවකයකු පිට්න් ගතහොත් අඩුතරමේ කොලඹ වටේ වු ටෙලිකොම් ශාඛා සොයාගන්නටත් ඔහුට කලක් ගතවෙන අතර කලින් සිටි රියදුරු කල කාරියාලීය කටයුතු සියල්ල ඉගෙනීමට ඔහුට කෂණිකව හැකිවේද යන්න ගැටලුවකි...එක් කලෙක මේ අපේම ආයතනය වන බැවින් රියදුරන් කාර්මික හා කාරියාලීය කටයුතු වලට සහභාගී විය යුතු බවත් එය අපගේ වගකීම බවත් අප පරිපාලනය ප්‍රකාශ කල අතර දැන් අප බෝනස් ඉල්ලන විට ඔවුන් අප සලකනුයේ අල්ලපු ගෙදර එකාට දාව ඉපදුන පැටියෙකුට සලකන ආකාරයෙනි..

ටෙලිකොම් ආයතනයේ සියලු අංශද අප මෙන් අනුබද්ධ්ත ආයතනද සියල්ල එකවර එකම ප්‍රමාණයෙන්

ලාභ ලබන්නේ නැත. එහෙත් ඔවුන් සියල්ලන්ටම එකම ප්‍රමාණයේ ප්‍රසාද දීමනා නැති උවත් කිසියම් හෝ ප්‍රසාද දීමනාවක් ලැබේ...එහෙත් අපට??

මා අයිති වන්නේ තාරුණ්‍යයට හෙටක් හරහා ටෙලිකොම් අනුයුක්ත වූ කන්ඩායමටයි ..බොහෝ අය සිතන ලෙස අප කිසිදු සුදුසුකමක් නැතිව අහසින් පාත් වූ පිරිසක් නොවෙමු..අප බොහෝ දෙනා උසස් පෙළ සමතුන් වන අතර ඉන් ඉහල සුදුසුකම් ඇත් තා වූ බොහෝ දෙනෙකු සිටී..කෙසේ උවත් චතුර ලෙස ඉංග්‍රිසි කථාකිරීමේ කුශලතාව හැර ටෙලිකොම් ආයතනයේ වන පාරිභෝගික සේවා නිලධාරින් සතුවන බොහෝ සුදුසුකම් අපවෙත පවතී..

මින් පෙර මෑන්පවර් වේතන එකතු කරන ලද 2008 දෙසැම්බර මසට පසුව අපේ වැටුප වන රුපියල් 9,500 ට වැඩි වී ඇත්තේ රු 500ක ප්‍රමාණයක් පමණි...මෙහිදී වැටුප් වැඩි වනුයේ සාමාන්‍ය යෙන් මූලික වැටුප සලකා වන බැවින් 5%වැටුප් වැඩි වනුයේ රුපියල් 500කටත් අඩු ප්‍රමාණයකි...බස් ගාස්තු,අල,පරිප්පු,සීනි,කැරට් බෝංච් වල මිල වැඩි වන්නේ අපිට එක ගානකිනුත් ටෙලිකොම් මහත්තුරුන්ට තවත් වැඩි වූ

ගනනකිනුත් නම් අපේ පඩි මූලික වැටුපට සාපේක්ශව වැඩි උනාට කිසි ගැටලුවක් නැත..එහෙත් බෝඩිමට 3500යි බස් එකට 700යි..ඇදුම් සපත්තුවලට 1500යි කෑමට දිනකට රුපියල් 150 .ක් උවත් මසකට වියදම් වන 4500ක කෑම වියදම ගිය පසු ඉතිරිවන මුදලින් අපි කෙදිනක නම් මේ 9,500න්

අනාගතය ගැන අනාත නොවු සිහින දකින්නේදැයි ඔබෙන් අසමු..

එම් අයි ඩීන් නැමැති පතෝල මහතා සේවයෙන් පහකල පසුව එක් විනාඩි 10ක් ඉතා සුලු පිරිසක් එලියට වන් කල ඔහුට සේවය ලැබුන ආකාරය මා ඇස් දෙකෙන් දිටිමි....මෙතරම් අමාරුවෙන් මිතුරකුගේ මංගල උත්සවයකටවත් යා ගත නොහැකි මට්ටමක වැටුප් ලබන අප වෙනුයෙන් ඔබලා එවැනි දේ නොකරනු ඇත..මන්ද ඔබ සියල්ලෝ මහෞෂධ පන්ඩිතයින් සඳුන් හරක් ගෙන ඉපදුනාක් මෙන් ඉංජිනේරු උපාධිය අතින් ගෙන ඉපදී ඇති බැවිනි..ඔබට ඉගැන්වීමට රජය වියදම් කල මුදල ඔබේ පරම්පරාව රජයට උපයා සපයා දී ඇති බැවිනි..

බෝනස් සඳහා ටෙලිකොම් සේවකයින් තරඟ කල පසුගිය වසරේ අවසන් කාර්තුවේ බොහෝ ටෙලිකොම් වෘත්තීය සමිති අපි වෙනුයෙන් කතා කල අයුරු ඔබට මතක ඇති..එහෙත් ඔවුන් විසින් අපගේ කියා දෙයක් වැඩි කල යුතු බවට පැහැදිලි අදහසක් නොතිබිනි..කන්ඩායම් කීපයටම උවමනා වූයේ යම්කිසි වැඩවර්ජන වැනි අවස්ථාවකදී අපද ඒ වෙනුයෙන් සම්බන්ධ කර ගැනීම පමණි..ඔවුන් විසින් අපි දිනා දුන්නා යයි උදම් අනන දීමනාව පවා බහුතර පුහුනුවන(ට්‍රේනී)

සේවකයින්ට නොලැබුනි..එහෙත් ටෙලිකොම් ආයතනයේ නම් කොන්තරත් පදනම මත ගන්නාලද සියලු සේවකයින්ට බෝනස් ලැබුණි...

දැනට ටෙලිකොම් මෑන්පවර් හරහා වන සේවකයින් බොහෝදෙනෙක් සුදුසුකම් ලබා තිබුනත් ඔවුනට උසස් වීමක් හෝ හැකි පරිදි ටෙලිකොම් ආයතනයට ඇතුලත් කරගැනීමක් නැත..සිටි ඇන්ඩ් ගිල්ඩ්ස් සම්පුරන සහතිකය ලැබු බොහෝදෙනෙක් ට්‍රෙනි ටෙක්නිකල් ඔපිසර හෝ ටෙක්නිකල් ඇසිස්ටන්ට් ලෙස මෑන්පවර් හරහාසේවය කරද්දී අද ඊයේ ටෙලිකොම් ට්‍රෙනින් සෙන්ටර් වල වු මුහුනු ටෙලිකොම් ටෙක්නිකල් ඔපිසර ටෙලිකොම් හැදුනුම්පත් සහිතව මා ඇස ගැටී ඇත.මෙය ටෙක්නිකල් පමණත් නොව ඔඩිට්,එකවුන්ට්.ඇඩ්මින් ආදී බොහෝ අංශවලට පොදු ලක්ශනයක් වෙයි.

මෙතරම් අමාරු වටපිටාවක සිටත් මෙහි රැඳී ඉන්නේ මන්දැයි ඔබට ගැටලුවක් පැනනඟිනු ඇත..මා පහුගිය මැතිවරනයේදී නාමල් මහතා වෙනුයෙන් වැඩකල කෙනෙකි..මේ මෑන්පවර් එක අප ගන්නා විට කීවේ මාස 6 ක පරිවාස කාලයකින් පසුව වැටුප වැඩි වන බවය..එහෙත් මාස 9ක් ගතවී ඇතත් වැඩි වැටුප් කියන දරුවා බිහිවන පාටක් නැත...මා මෙන් මෙවැනි ලොකු ජොබ් නොසෙවු මගේ මිතුරියන් බොහෝ දෙනෙක් දැනටම කටුනායක කොග්ගල සහ හමහරෙක් ගමේම ගාමන්ට එකට ගොස් මසකට රු 20,000ට නොඅඩු වැටුප් ලබා ලස්සන පවුල් ජිවිත ගත කරති..මටද එසේ යා හැක එහෙත් දෙමාපියන් අමාරුවෙන් මහ පොලොව සමඟ ඔට්ටු වී ලබාදුන් මුදලින්බයෝ වලින් සී 3 කින් සමත් වීඇති මා එවැනි රැකියාවක් කිරීම මගේ දෙමාපියන් නම් කිසිවිට අනුමත් නොකරනු ඇත..

මා මේ ලිපියෙන් ඔබේ අනුකම්පාව ඉල්ලනවා නොවේ...නවදාස් පන්සීයකින් මා හට තනිවම ජීවත් වීමට මෙසේ අමාරුනම්...14,500 කින් රියදුරෙක්,තාක්ශනික සේවකයෙක් කෙසේ තම දරු දෙදෙනෙකුගෙන් යුතු පවුල ගෙනයයිද???

මහත්වරුණි අනුකම්පාවට පව් නිසා නොව ඔබ සමඟ උරෙනුර ගැටී වැඩකරන මේ ඔබේ සහෝදර සේවකයා නිසා හෝ ඔහු ගේ දුක වෙනුයෙන් පෙනී සිටින්න...

අප සියලු මෑන්පවර් සේවකයින්ට 18,500කවත් මූලික වැටුපක් වෙනුවෙන් පෙනී සිටින්න..

හදන්න බැරි ස්පීඩ් එකකින් කැඩෙන CDMA

2011-02-05T04:58:00.000-08:00

සිටිලින්ක් ෆෝන් වල නව ෆෝන් නිසි කලට නොලැබීම නිසාත් උපාංග වල හිඟ බව නිසාත් ෆෝන් අලුත් වැඩියා කරන්නන් දැඩි අපහසුතාවයකට ලක්වන බව වාර්තා වෙයි..මේ ගෙන්වන බොහෝ සී ඩී එම් ඒ ෆෝන් බාල තත්වයේ ඒ වා වීම නිසා ඉතා ඉක්මනින් බිඳ වැටීම් වලට ලක්වන බව සේවකයෝ පවසති..බොහෝ විට බැටරිය බැසීම් ආදී වන සුලු නඩත්තු කටයුතු වලට පවා අවැසි බැටරි නොලැබෙන බව බොහෝ පැතිවල සේවය කරන සී ඩී එම් ඒ සේවකයෝ පවසති..බැටරි ඩිස්ප්ලේ සහ අනෙකුත් උපාංග හොඳ තත්වයේ ඒ වා ලබා දෙන්නේ නම් අඛන්ඩව සේවා ලබාදිය හැකිබව අප සී ඩී එම් ඒ සහෘදයින්ගේ අදහසයි..
තවද නව බැටරි යැයි ආයතනයෙන් ලබාදෙන බැටරි පරන බැටරි වලටම අලුත් කවර දැමූ අවස්ථාද වන බව සේවකයෝ පවසති..

සාමාන්‍යාධිකාරීවරුන්ගේ වැරදි වලට පව් නැත

2011-02-05T04:47:00.000-08:00

M.අයි ඩීන් මහතා යනු දැන් සාමාන්‍ය අධිකාරී වරයෙකි..ඔහු කලින් කරනු ලැබූ වරදක් නිසා ටෙලිකොම් ආයතනයේ ප්‍රධාන විධායක නිලධාරී තුමා විසින් ඩීන් ව වහාම ක්‍රියාත්මක වන පරිදි ආයතනයෙන් නෙරපා හරින ලදී..පසුව ටෙලිකොම් ඉන්ජිනේරු සංගමය මැදිහත් වී ඔහුව නැවත සේවයට බඳවාගන්නා ලදී....අපට ඇති ප්‍රශ්න
*එක් දිනෙක විධිමත් පරීක්ශනයකින් වරදකරු වූ අයෙකු නැවත සේවයේ පිහිට වූයේ ඔහු විසින් කරන ලද මිලියන සිය ගනනක පාඩුව අතුරුදන් වූ නිසාද??
*දැනට ඔහු විශේෂ ව්‍යාපෘති සඳහා සාමාන්‍ය අධිකාරී වෙයි..වරක් ලක්ශ දහස් ගනනක් පාඩු කල අයෙක්ට නැවත නව තනතුරු දෙන්නේ ඇයි??
*ඔහුගෙන් සේවයක් බලාපොරොත්තු වන්නේ නම් ඔහුට අදාල වන එකදු ඉන්ජිනේරුවෙකු හෝ කිසිදු තාක්ශනික සේවකයෙකු නැත්තේ ඇයි...
*මිලියන ගනනක අයි පී ටී වී මගඩියට වගකිව යුත්තේ ව්‍යාපෘති කලමනාකරුවා නොවෙයි නම් වෙන කිනම් පුද්ගලයෙක්ද???

sri lanka telecom calanders

2011-01-17T21:02:00.000-08:00

නව වසර සඳහා ටෙලිකොම් ආයතනයෙන් ලබාදෙනු ලබන කැලැන්ඩර සහ දිනපොත් මෑන්පවර් සේවකයින් සඳහාද ලබාදීමට මෑන්පවර් ආයතනය කටයුතු කර ඇත..පසුගිය වසරේ මෙන් කලින් පැමිණි අයට පමනක් ලබා නොදී සියලු සේවකයිනට මෙම කැලැන්ඩර ලබාදෙනු ඇතැයි අපි සිතමු...අද දින වනවිටත් සමහර ප්‍රදේශවල මෑන්පවර් සේවකයිනට මෙම කැලැන්ඩර සහ දිනපොත් ලැබී නොමැත...කැලැන්ඩර හා දිනපොත් පමාවීමටනම් කෙලින්ම ඒ සඳහා වගකිව යුතු වන්නේ ඊට අදාල අංශය වෙයි..මුල්ම කැලැන්ඩර තොගය ප්‍රධාන නිලධාරීන්ට පවා බෙදාහරිනු ලැබුවේ දෙසැම්බර මස 28-29 යන දිනවලදීය..බොහෝ ටෙලිකොම් සේවකයින්ටද දින දර්ශන දිනපොත්..කාඩ් ලැබුනේ වසර උදාවී සතියක් හමාරක් ඉක්ම ගිය පසුව වෙයි..

අප ආයතනය රටේ සෑම තැනකටම සේවා සැපයිය හැකි විශාල විභවයක් සහිත ආයතනයකි..අපේ වෙළඳ නාමය ප්‍රචලිත කිරීමට මෙම සුභපැතුම්පත්,දින දර්ශන,දිනපොත් යොදාගත හැක..ඉතින් නොමිලයේ අප ආයතනය සහ නාමය ජනප්‍රිය කලහැකිව තිබීයදීත් අපගේ මිතුරෙකුටවත් කාඩ්පතක් යැවීමට අප ආයතනයේ කාඩ්පත් අපහට නොලැබෙයි..අපි අපිට නොලැබෙන දේ ගැනම කියා අඬනවා නොවේ..එහෙත් ඈත ගම් දනව් සිසාර නගරයේ පැල්පත දක්වා යා යුතු අපගේ "ආයතනික නාමය" ජනප්‍රිය කිරීමට අපට මීටවඩා අවකාශ දෙන්නේ නම් හොඳ බව අප සිතමු..

කාල රාමුවකට අනුව නිවැරදි වේලාවට සියලු කටයුතු සිදු කිරීමේ හැකියාවක්ටෙලිකොම් සමාගමට තිබුනි නම් අවම වශයෙන් දිනපොත්,දින දර්ශන හා සුභපැතුම්පත් අප සේවා දායකයින්ට නව අවුරුදු උදාවේදීම දිය හැකි විය යුතුය..එහෙත් මේ තුනෙන් එකක්වත් සමහර ටෙලිකොම් විධායක සහකාර වරුන්ට පවා පලමුවෙනිදා වනවිට ලැබී තිබුනේ නැත..එක් දෙයකට ප්‍රමාද දෝශ සිදු විය හැක..එහෙත් 3ටම...සමහරවිට මෙවැනි ක්‍රියා ඉතා සුලු දේවල් වීමට පුලුවන..එහෙත් විශාල වගකීම් වලට විශාල වරප්‍රසාද සහිතව සිටින ටෙලිකොම් නිලධාරින් මේවා ගැන නැවත සිතීම වටී...සංදර්ශන වලින්ම ආයතන පවත්වා ගත නොහැක..එය අපි වැනි උගත් කමින් අඩු සේවකයින්ට හිතෙන හැටි වෙයි...

රොඩ්ඩ අස්කල හැටි..(Rodney's Leaving)

2011-01-06T00:37:00.000-08:00

අඩෝ මේ රොඩ්නි උඹව නිසල් මහත්තය අස්කලාද?/ නැත්නම් උඹ අස් වුනාද??

කැන්ටිමට ආ රොඩ්නිගෙන් සගයෙක් ප්‍රශ්න කරයි..

එක හරි දි ග කතාවක්...

උඹලට මතකද මෑන්පවර් එකේ කලින් දීපු 6000හෙ පඩියයි...4000හෙ එලවන්ස් එකයි එකතු කොරල මුලු පඩිය 10,000 කරපු කාලෙ..

ඔන්න ඔය කාලෙ තමා මම නිසල ලඟ වැඩ කලේ..ඒ වෙනකොට එතෙන්ට ඇවිත් මාසයක් විතර..

ඉති න් ඔය වැඩිඋන දවසෙ නිස ල වාහනේට නඟින ගමන් අහනව..හා රොඩ්නි ඔයාලගෙ පඩි වැඩි උනාලු නේද...දැන් ඉතින් 10ක් විතර හම්බ වෙනවනෙ...ඔය මැදෑ...නේද ??/

උඹලට මතකනේ ඕක උනේ දැනට අවුරුදු 2කට විතර කලින්නේ...ඉතින් ඒකාලෙත් මහා ලොකු ගානක් නෙමෙයි රුපියල් 10 දාහ...

මට මූ ගැන මල..මම ඒත් මුකුත් කියන්නෙ නැතුව හුම් කියල නිකම් හිටිය...

පොර ගියා කඩේකට..ගත්තෙ පරිප්පු 200යි ලූනු 250යි අල 500යි..එතකොට අල ලාභයි මගෙ හිතේ...

මම එතකොට වාහෙන හිටියෙ..මිනිහ නිකම් බිස්කට් එකක් ගන්න වාගෙ කාර් එකෙන් බැහැල..ගිහින් අරපොඩි කඩෙන් බඩු ගත්ත..නිසලගෙ ගෙවල් තියෙන්නෙ කැස්බෑවෙනෙ...කැස්බෑවට ගොඩක් මෙහා තැනකින් තමා පොර බඩු ගත්තෙ...මොකද ඕයි,,,

ගෙවල් පැත්තෙන් ගත්තොත් නෝන්ඩිනේ...බඩු ටික අරන් ආව මිනිහ වාහනේට..මමත් කාර් එකේ හිටිය ට කන දාගෙන තමා හිටියෙ..

ඉතින් ආපු ගමන් ඇහුව මහත්තය අල ලාභයි නේද කියල...ඌනු නම් ගනන් මගෙ හිතේ කියලත් කිව්ව මම..

නිසලට තේරුනා මම එයා ගතපු බඩු ටික අහගෙන හිටිය කියල..එතකොටත් ඕයි ඌට ලක්සෙට වඩා පඩි..ඉතින් පොරට නෝන්ඩියි,,

පස්සෙ මම කිව්ව මහත්තයල ඔච්චර අරගෙනත් බඩු ගන්නෙ ඔහොම අපි ඉතින් මේකෙන් මොනව කරන්නද කියල....

ඊට පස්සෙ නිසල කිව්ව ඔය ඊළඟට තියෙන පෙරේර ඇන්ඩ් සන්ස් එක ළඟින් පොඩ්ඩක් නවත්තන්න කියල...

මමත් නැවැත්තුව..ඒ පාර මිනිහ ඒකෙ ඇතුලට ගිහින් මට මාලුපාන් එකකුයි සොසේජස් බන් එකකුයි ගෙනාව..

තව පාර්සලේක අර ලොකු සයිස් බනිස් ගෙඩියක් දමල ගෙනත් දුන්න ලමයින්ට ගිහින් දෙන්න කියල...

ඔන්න තව දවසක් ගියා අර කොටුවෙ තියෙන ලෝක වෙලඳ මධ්‍යස්ථානෙ ට නිසලත් එක්ක ගියා එදා හරි කලබලයක් තිබුනෙ එයාට..

මට කිව්ව වාහනෙටම වෙලා ඉන්න මම ටක් ගාල එනව.තව ටිකකින් මම වැලිකඩ ඉන්න ඕනි.කියල..ඉතින් අර ඕකෙ තියෙන දාර පාක් එකේ වාහනෙ ගහන් මම හිටිය විනාඩි 20ක් විතර මෙයාගෙන් මිස් එකක් එනකල්..ම්හු නෝ කෝල්..ඔය මධ්‍යස්තානෙත් යන්නෙ එන්නෙ මහ විසාල කෑලි නෙ..ඉතින් මම වාහනෙ ලොක් කරල කෑල්ලක් කාරිය බලාගන්න කියල ආව..ඇවිත් ඉතින් ඕකෙ පඩිපෙලවල් තියෙනව..නිකම්ම යන්න...නිකම් යන එකනෙ ඉතින් මම තට්ටු තුන හතරක් නැඟල ටිකක් විස්තර කාරිය බැලුව මේක කොහොමද කිය්ල...හැමදේම ඉන්ගිරිසි..හැමතැනම බාගෙට ඇඳගෙන..ඉතින් ඔහොම තට්ටු හතරක් පහක් නැග්ගයි කියමුකො..මෙන්න කෝල් එක එනව

නිසල බොසා ගෙන්...රොඩ්නි කොහෙද ඉක්මනට එනව දැනටමත් ලේට්...එතකොට මිනිහ කාර් එක ළඟ...

යකෝ කාර් එකට යනවනම් කෝල් එකක් දීල පල...එහෙමත් නෑ..හරි සර් සුටුස් ගාල එනව කියල හොයල හොයල නැග්ග ලිෆ්ට් එකට ..හුටා ඒක උඩට යන එකක් ...ඉතින් ලිෆ්ට් එකේ හිටපු පොරගෙන් අහන් පහලට බැහැල වාහනෙට එනකොට නාට්ටියෙ විනාඩි 5ක් විතර ගිහින්..පොරට ඕසෙට තදවෙලා...ත තමුසෙ රවුං ගහනව මම මෙතන පිච්චෙනව..කොහොමද ඕයි තව විනාඩි 15කින් වැලිකඩට යන්නෙ...

හරි සර් විනාඩි 14න් වැලිකඩ..හැරෙව්ව වාහනෙ...දැම්ම අර ලේක් හවුසිය ඉස්සරහින් මරදානට..දමල හිරගෙදර ඉස්සරහට වැටෙන පාරෙන්..විනාඩි 15 යනකොට වැලිකඩ..ගිය වේගෙට මිනිහ අත් දෙකෙන්ම අර අල්ලන්න තියෙන හැඬල් එක අල්ලගෙන...ටිකක් වාහනේ කපල ඕවටේක් එකක් දානකොට මිනිහ ඇස්දෙක පියා ගන්නව...මමත් ඉතින් දන් නැද්ද බන් බස් වල ටර්න් එකට කොටන්නයි විදින්නයි ඉගෙනගත්තෙ..ඔය නිසල බොසා ල කැමපස්වල හිටපු කාලෙ...

බහිනකොට මිනිහ කියනව..තමුසෙනම් මගේ ෆ්‍රෙශර් එක එක්ක සෙල්ලම් කරනව ඕයි..මේ බලනව මාව ගැහෙන්නත් වාගෙ...

තව දවසක් දෙකක් ගියාම මොකක් හරි බෝම්බ කේස් එකක් නිසා හැමතැනම චෙක් පොයින්ට්...පොරත් එක්ක මම යනව...එකපාර ස්ටොප් බෝඩ් එකක් වැටුන..ඉතින් මගේ ඉස්සරහින් ගිය වාහනේ නැවැත්තුව...මම ඉතින් ටෙලිකොම් බෝඩ් එක තියෙන නිසයි අනික කලින් එක නැවැත්තුව නිසයි..මම ආව ගානක් නැතිව...

නිසලය කුලප්පු වෙලා කියනව..නවත්තනව ඕයි වාහනේ..දැක්කෙ නැද්ද තමුසෙ බෝඩ් එක කියල කිව්ව..එතකොට මිනිහ හිටියෙ ඉස්සරහ සීට් එකේ...

නවත්තනව ඕයි වෙඩිතියයි දැන් මිනිහ වෙවුල වෙවුල කෑ ගහනව...

මම කිව්ව,, සර් හමුදාව වෙඩිතිව්වොත් සර්ගෙ පැත්තට,, කලින් වැදෙන්නෙ මට නෙමෙයි නේ...

ඊට පස්සෙ මිනිහ ඔෆිස් එකට ඇවිත් බහිනකොට කිව්ව..

තමුසෙ හිටියොත් මගේ ෆ්‍රෙශර් කටු පනිනව...තමුසෙ ලබන මාසෙ වෙන තැනක..පස්සෙ වෙන ඩ්‍රයිවර කෙනෙක් අරන් මම මේ දැන් ඉන්න ගෑනි ළඟට දැම්ම...

ඒ මාසෙ ඇතුලෙම...

The bonus season of telecom

2010-12-14T04:34:00.000-08:00

බෝනස් ලැබීම....මෙවර ටෙලිකොම් ආයතින සේවකයින්ට අවමය රුපියල් 70,000ක බෝනස් මුදලක් ලැබෙන අතර මෑන්පවර් සේවකයින්ට රුපියල් 15,000කට අඩු මුදලක් බෝනස් එකක් නොව දීමනාවක් ලෙස ලැබේ..මේ ප්‍රමාණයවත් ලබාදීමට තීරණය කර ඇත්තේ වෘත්තීය සමිති වල ඉල්ලීම නිසාය..කල තුටු කල වල ඉහින යූනියන් කාරයෝ කිසිවෙක් අපිට විස්වාස නැත..ඔවුනට අවැසි වන්නේ අපේ සහය ඔවුන්ගේ යූනියන් වෙත ලබාගැනීම පමණි...70,000ක බෝනස් ලබන සේවකයෝ මෑන්පවර් අපිට 15000ක් දෙන ලෙස ඉල්ලා ඇත...අනේ අපේ මහතවෘන්ගේ මහා කරුණාව...සාදු සාදු සාදු...

කරාටි ඉංජිනේරුවා....

2010-11-07T18:57:00.000-08:00

නන්දසිරි ලොකුකලුගේ යනු සුප්‍රකට කරාටේ ක්‍රීඩකයෙකි..ඔහු පදක්කම් ගනනාවක් දිනා ඇත..ඔහු ශාරීරික සුවතා පිළිබඳ විසේසයෙන් හදාරා ඇත..
මීට වසර දෙක තුනකට පෙර ඔහු ශ්‍රී ලංකා ටෙලිකොම් ආයතනයට එකතු විය..ඒ A-10 නැමති ශ්‍රේනියෙනි..ඔහු එවිට තාක්ශනික සහකරුවෙකි(TTA).
ඉන්පසු ඔහු ටෙලිකොම් ආයතනයේ ශරීර සුවතා හා ක්‍රීඩා සම්බන්ධ නිලතල කීපයක් දැරීය..ටෙලිකොම් ආයතනයේ අයට නොමිලේ කරාටි පන්තියක්ද පවත්වන ලදී..
එහෙත් ඔහු සේවයේ නියුතු වූයේ සම්ප්‍රේශන ව්‍යාපෘති අංශයේය..ඔහුට තාක්ශනික හෝ ව්‍යාපෘති දැනුමක් තිබීදැය් අප නොදනිමු..එහෙත් ලංකාව පුරා ඉතා විශාල වැඩ ප්‍රමාණයක් වෙන එම අංශයට ඔහුගෙන් ලැබුන සේවයක් නැත..තිලක් සිල්වා නම් වූ පුද්ගලයාගේ සමීප හිතවතෙක් වූ නන්දසිරි කිසිම වැඩක් නොකලත් එම අංශයේ ප්‍රධාන නිලදාරියා තිලක් ද සිල්වා වූ නිසා නන්දසිරිගේ ඇගයීම් ලකුනු ඉතා ඉහල විය..
තිලක් ද සිල්වා කලක් කරාටේ ඉගෙන ගෙන ඇත්තේ මොහුගෙන් විය යුතුය එහෙත් සියලු වරප්‍රසාද සහිතව සහකාර ඉන්ජිනේරු ශ්‍රේනිය දක්වා උසස් වීමට නන්දසිරිට සිල්වානෝ නොමද සහයක් ලබාදුන්නේය..ඉන්නට තැනක් නොමැතිව තැන තැන ඇවිදින විධායක සහකාර ඉන්ජිනේරුවරු සිටින මූලස්තාන ශාකාවේ අලුතින් පත්වූ සහකාර ඉන්ජිනේරු නන්දසිරිට කාමරයක් පුටුවක් මේසයක් ලැබුනි..මොනදේ ලැබුනත් දවසේම අමතර වැඩ සහ තැන තැන කතා කිරීමට අමතරව නන්දසිරිගෙන් ආයතනය ට අංශයට වූ සේවයක් නැත..
මේ ළඟදී නන්දසිරිට තවත් උසස් වීමක් ලැබුනි එනම් දැන් නන්දසිරි ඉන්ජිනේරු මහතෙකි..පිලිගත් ආයතනයක උපාධියක්..හෝ ඩිප්ලෝමාවක් හදාරා වුවද මෙතරම් ඉක්මනින් උසස් වීම් ලබාදීමට නන්දසිරි ආයතනයට කර ඇති සේවය කුමක්ද??ආයතනයේ මුදල් වියදම් කර ඔහු පිටරට ගොස් ලංකාවට සම්මාන රැගෙන එනවා වන්නට පුලුවන..එහෙත් ඒ අනුහස නිකම් බාස් කෙනෙකු වන නන්දසිරි ඉන්ජිනේරුවකු කිරීමට තරම් විශාලද??
සුදුසුකම් සපුරා ඇත්නම් නන්දසිරි ප්‍රධාන නිලදාරියෙකු වූවත් අපට කම් නැත ..එහෙත් උසස් ඩිප්ලෝමා සම්පූර්ණ කර ඉතා කැපවීමක් යටතේ දිවා රෑ නොබලා වැඩ කරන මෑන්පවර් සේවකයන් අනුකම්පා විරහිතව කුඩම්මාගේ සැලකිලි ලබද්දී නන්දසිරි අවුරුදු 2-3කින් ඉන්ජිනේරුවෙකු වන්නේ ඔහු කරාටේ ගහන නිසාද???
නන්දසිරිගෙන් ආයතනයට වැඩක් ගත යුතුනම් ඔහු සිටිය යුත්තේ මාකටින් හෝ ශරීර සුවතා හෝ ආරක්ශක අන්ශයකය එහෙත් නිකම් ඉඳීමට ලේසි නිසා නන්දසිරි තවමත් ව්‍යාපෘති අංශයේම සේවය කරයි..
අහෝ මෙතරම් දේ වීත් ටෙලිකොම් ආයතනික ඉංජිනේරුවන් නිදි ගැට නොකඩන හැඩ...
සතුරෝ ඔවුන්ගේ නිවසට විත් සිය බිරින්දෑ සමඟ නිද්‍රාගත වුවත් පසුව තමාට බිරින්ඳෑ භාවිත කලහැකි වේයැයි සිතා සැනසෙන ටෙලිකොම් වෘත්තීය සමිති වල ඇස් මේ වෙත දැන්වත් යොමු වේවායි පතමු..

පෙට්‍රල් ගැසීම....

2010-11-01T06:25:00.000-07:00

පෙට්‍රල් ගැසීම....
අපේ රටේ පෙට්‍රල් ඩීසල් ගැසීමට පිරවුම් හල් තිබෙයි...ඉතින් බොහෝ ඒවා දැන් නවීන තාක්ශනයෙන් සන්නද්ධ වී ඇත...ඒවායේ බොහෝදුරට වන්නේ මුදලට අනුව තෙල් පිරවීමයි..ඉතින් අපිට ඕනි නම් රිපියල් සීයක උනත් තෙල් ගහත හැකි අලුත් සෙඩ් වලින් කිසි අමාරුවක් නැතිව...ඕනි ගාන කැල්කියුලේටරයක් වගේ එකකට ඇතුලත් කලාම ඒ ගානට හරියන තෙල් වදිනව,...අපිට ඒක ලොකු වාසියක් නැත්නම් පොඩි කාසි හොය හොය දඟලන්න වෙනව...

ඉතින් ඔය දැන් කොම්පියුටර තාක්ශනේට ලෝකෙ යද්දි මාරම විදිහෙ අලුත් දේවල් අපිට අහන්න දකින්න ලැබුන...ඉතින් ඒ අනුව දැන් ලෝකෙ ඉලෙක්ට්‍රොනික් කාඩ් එකෙන් තෙල් ගහන්න පුලුවනි...ඔයාල ක්‍රෙඩිට් කාඩ් ගැන දන්නවනම් ඒව පාවිච්චි කරන්න පුලුවනි නැත්නම් අපි අර මොබිටෙල් ඩයලොග් ප්‍රී පේඩ් කාඩ් ගන්නව වාගෙ ..කාඩ් එකක් ලොකු ගානක් දීල අරන් තෙල් ගහගන්න පුලුවන්...පිටරට ඒ තරන් හොඳට ඒ වාගෙ ලේසි දේවල් තියෙනව...එතකොට අපිට තියෙන්නෙ අපේ කාඩ් එක ඒ සහායක තුමාට දෙන එක විතරයි...
අපිට මේක කියන්න හිතුනෙ මෙතෙක් කල් අපේ ටෙලිකොම් මූලස්තාන ශාඛාවෙ තිබ්බ ඉන්ඪ්Hඅන පිරවීමේ ක්‍රමවේදය වෙනස් කරල...
අතින් පිරවෙන පෝරම් කොල සීල් වාගෙ දේඅවල් වලින් සමන් විත වුනු එම ක්‍රමවේදය දැක්කම අපිට මතක් වෙන්නේ ටෙලිකොම් එකේ තියෙන විශන් සහ මිශන්...
විද්‍යුත් සන්නිවේදනයේ මහගෙදර කියල හඳුන්වගන්න අපි තෙල් ටිකක් ගහගන්නත් කොල පුරවගෙන මහත්තුරු ළඟ පෝලිමේ ඉන්නව....ඒ අස්සන ගන්න...ඊට පස්සෙ ඒ තෙල් වලින් ගිහිපු ගමන් විස්තර හරියටම බැලන්ස් කරන්න ඕනි...ඇයි ශෙඩ් එක ලඟ තියෙන පෝලිම....හරිම ආශ්චර්යන් තමා.,,,,

ශිෂ්‍යත්ව ප්‍රධානය,....

2010-10-16T00:06:00.000-07:00

අද දින මූලස්ථාන ශාඛාවේදී ටෙලිකොම් මෑන්පවර් ආයතනයේ සේවකයින්ගේ දරුවන් සඳහා ශිෂ්‍යත්ව ප්‍රධානෝත්සවයක් පැවතිනි,,,එහිදී ශිෂ්‍යත්ව ප්‍රධානයක් සිදුවෙන ලදී...අප විසින් මේ දැනුවත් කිරීම සිදු කරන්නේ එම අවස්ථාවට සහභාගී නොවීම අපගේ කාර්යසාධන ලකුනු අඩුවීමට හේතුවක් විය හැකි නිසාය....අප ආයතනයේ මින්පෙර පැවති පිරිත්,ක්‍රීඩා උත්සව,චාරිකා වලට සහභාගී නොවීම පෙර පැවති කාර්යසාධන සම්මුඛ පරීක්ශන වල ලකුනු අඩුවීමට බලපාන ලදී....කාර්ය සාධන ලකුනු කෙලින්ම සිය අනාගත රැකියා දිවිය පිණිස බලපාන බැවින් මෙසේ ඔබව දැනුවත් කරමු..

දැන් එම අවස්ථාව සඳහා සහභාගී විය නොහැකි වුවත් බොරුවක් හෝ තෙපලීමට දවස වැදගත් වන බැවින් මේසේ මතක් කර සටහනක් තබමි..මින්පෙර ඔබව දැනුවත් කිරීමට නොහැකි වූයේ මූලස්ථානයේ සේවය කරන අප සහෘදයන් පවා මෙවැනි දෙයක් සම්බන්ධයෙන් දැනුවත් නොවී සිටි නිසාය....ඔබට ඔබේ සේවා ස්ථානයේ කෙතෙක් වැඩ තිබුනත් ආරන්චි වුවහොත් මෙවැනි අවස්ථාවලට නිවාඩුවක් දමා හෝ සහභාගීවන්න...මන්ද????

ටෙලිකොම් මෑන්පවර් ආයතනයේ කාර්යසාධන පරීක්ශන මෙහෙයවන්නේ කිසිදු තාක්ශනික දැනුමක් නොමැති කොම්පියුටර එබීමට පමණක් දන්නා යහලු යහෙලියන් වීම සහ ඔවුන් මෙවැනි උත්සව ගැන විනා කටෙලිකොම් ආයතනයේ තාක්ශනික සේවා ගැන මෙලෝ හසරක් නොදන්නා චූටි බබාලා වීමය...ඔවුන් එසේ වීම ඔවුන්ගේ වරදක් නොවේ එහෙත් බලලුන් ලවා කොස් ඇට බෑවීමට වඳුරන් උත්සාහ කරන විට බලලුන් සිය අවයව ගැන පරිස්සම් වීම වැදගත් වෙයි....

මෑන්පවර් සේවාව ගැන නොදන්න කෙනෙකුට මෙය කියවීමේදී ගැටලු ඇතිවිය හැක...එසේ ගැටලු පවතීනම් කරුනාකර කොමෙන්ට් එකකින් විමසන මෙන් කාරුණිකව ඉල්ලමි..

ඉන්ටර්නෙට් මේ ඇතිද???

2010-09-04T00:45:00.000-07:00

ඇත්තටම වෙනරටවල් එක්ක ගත්තහම ඉන්ටර්නෙට් අපිට මේ තරම් ස්ලෝ ඇයි????ඒක මාරම ප්‍රශ්නයක්.....

main server locations

ඇත්ත්ටම ප්‍රධාන සර්වර්වල ඉඳල තියෙන දුර බලපානව ස්පීඩ් එකට උදාහරන විදිහට දැන් ගූගල් යාහූ සර්වර් තියෙන්නෙ ඉන්දියාවෙන් නිසා අපිට ගොඩක් ඉක්මනට අනෙක් සර්ච් එන්ජින් වලට වඩා පහසුවෙන් යාහු ගූගල් ඇක්සස් කරන්න පුලුවනි...මෙතන දුර කියල කියන්නෙ භෞතිකව තියෙන දුර හෙම නෙමෙයි..ප්‍රධාන වශයෙන් අපිට හිමි නෙට්වර්ක්,, කේබල හා අපි විසින් හිමිකරගෙන තිබෙන මාර්ග...උදාහරනයක් කීවොත් අද එයාටෙල් ඩයලොග් වලින් ඉන්දියාවට රුපියල් දෙකකින් කතා කරන්න පුලුවන් උනාට මාලදිවයිනට කතා කරන්න රුපියල් 70ක් විතර යන්ව වැට් රහිතව ...උදාහරන විදිහට කීවොත් ස්කූල් නෙට් හරහා උබන්ටු සීඩී ඩවුන්ලෝඩ් කරගන්න යන්නෙ විනාඩි 10කටත් අඩු කාලයක් මොකද...ස්කූල් නෙට් තියෙන්නෙ ලන්කාවෙ නිසා....ඒ වාගෙම තවම ලන්කාවෙ අපිට අමෙරිකාව හා ජපානය කියන රටවලට ප්‍රධාන මුහුදු කේබල නෑ (sea-me-we=south east asia-middele east-western europe)ඒ නිසාත් අමෙරිකා ඉඳල ඇක්සස් වෙන ගොඩක් වෙබ් ඇප්ලිකේශන් ස්ලෝ කියල තමා ගොඩක් අය කියන්නෙ...

දැන් ලන්කාවෙ ඉන්ටර් නැශනල් දත්ත හුවමාරු වෙන්නෙ කෝමද???

ජාත්‍යන්තර මට්ටමේ ප්‍රධාන මුහුදු කේබල හිමි වෙන්නෙ ලන්කාවෙ දුරකතන සමාගම් දෙකකට විතරයි....එකක් ටෙලිකොම් අනික ලන්කා බෙල්....ඩයලොග් එයාටෙල්,,මොබිටෙල් ආදී ඒවයෙ ගොඩක් අන්තර්ජාතික දත්ත සම්ප්‍රේශනය වෙන්නෙ ටෙලිකොම් සමාගම සතුව තියෙන කේබල දෙකෙන්.(sea-me-we 3 & 4)..ඒත් දැනට ඒ දෙකෙන් වැඩ කරන්නෙ හොඳටම එකයි...අනෙක් පරන කේබලය හරහා යන දත්ත ප්‍රතිශතය අඩුයි...ලන්කා බෙල් කේබල ව්‍යාප්‍රතිය ගැන කීවොත් එයාලට ඒ තරම් ලොකු මාකට් එකක් ලන්කාවෙ නැති නිසා තවම එයාලට ආයෝජනය කල මුදල හොයාගන්න එක ගැටලුවක් වෙලා.....

මොකක්ද බොටල්(bottle neck) නෙක් එකක් කියන්නෙ....

ලන්කාව කෙලින්ම අන්තර්ජාතික කේබලයට සම්බන්ධ වෙන්නෙ නෑ...අපි ආරම්භයෙදි ආයෝජනය කරපු මුදල අනුව තමා අපිට හිමි වෙන කොටස තීරනය වෙන්නෙ..ඉතින් අපි අරගෙන තියෙන ලිමිට් එක ගොඩක් පොඩියි,,ඒ නිසා අපිට අර අසහාය ස්පීඩ් එකක් ලැබෙන්නෙ නෑ....මේකට කියන්නෙ ලන්කාව ඉනටර්නැශනල් කේබලයට(submarine cable) සම්බන්ධ වෙන්නෙ බෝතල හිසක් (bottle neck)හරහා කියල...

ඉතින් මේ ස්ලෝ එක නැති කරන්න ටී ආර් සී එක,,ටෙලිකොම් එක මොනාද කරන්නෙ..මොනවද ගන්න ක්‍රියා මාර්ග...
උත්තරය : තවම ඇඟට දැනෙන්න මුකුත්ම නෑ.....

නාමල් සහ රන්ජිත්.....

2010-09-03T05:57:00.000-07:00

මෑන්පවර් ටෙලිකොම් හි ජොබක් ලබාගත හැක්කේ කෙසේද???

අවුරුද්දක සහතිකය,,තාක්ශනික පලපුරුද්ද ආදිය මූලික සුදුසුකම් උවත් ටෙලිකොම් ආයතනයට පැනීම මෙන්ම අමාරු කාර්යක් ලෙස අද මෑන්පවර් ආයතනයට ජොබට යෑම පත්වී ඇත...

පසුගිය මැතිවරණය අවසන නාමල් රාජපක්ෂට තංගල්ලේ වැඩ කල තරුණැ පිරිසක් ටෙලිකොම් හි රැකියාවට බඳවාගෙන ඇත..එසේ බඳවාගත් පිරිස සිතාගෙන සිට ඇත්තේ කෙලින්ම ටෙලිකොම් ආයතනයට බඳවා ගැනීම් සිදුකල බවයි..එහෙත් ටික කලක් යන විට කොකාගේ සුද මතුවෙන්ට පටන්ගෙන තිබේ...එනම් එම පිරිස නාමල් මහතාට වැරදී තමන්ව මෑන්පවර් කොම්පැනියකට දමා ඇති බව අවබෝධ කරගෙන ඇත...

මෙහිදී නාමල් යනු නාමල් රාජපක්ශ නැමැති තාරුණ්‍යයට හෙටක් සන්විධානයේ කැඳවුම්කාරයා වෙයි....

රන්ජිත් රුබසිංහ යනු..ශ්‍රී ලංකා ටෙලිකොම් ආයතනයේ ශරීර සුව තා පිළිබඳ ඉන්ජිනේරු මහතෙකුව සිට...පසුකාලීනව නාමල් ගේ පවුල සමීපයට යෑමේ හැකියාව තිබූ පිනෙන් ටෙලිකොම් ආයතනයේ නියෝජිත සමාගමක් ලෙස පිහිටවනු ලැබූ මෑන්පවර් සමාගමේ වර්ථමාන ප්‍රධාන පරිපාලකයා වෙයි...ඔහුගේ ගම තංගල්ල ප්‍රදේශයේය..ඔහු රාජපක්ශ මැදි මහ විදුහලේ ආදි සිසු සංගමයේ නිලධාරියෙකි...ඉතා කපටි මොල ගෙඩියකින් හා සමනල කටහඬකින් හෙබි මෙතුමා බෝල බස්සවා මෑන්පවර් සේවකයින් ඉතා ආදරයෙන් රැකබලා ගනී....

මේ දේවල් බොරුයැයි සිතන කෙනෙකුට මා එක ප්‍රශ්නයක් ඉදිරිපත් කරමි...මේ වසර මුලදී එක්තරා අවස්තාවක මෑන්පවර් ආයතනයට බඳවාගත් පාරිභෝගික සේවා නිලධාරීන් සියලු දෙනාම තාරුණ්‍යයට හෙටක් සන්විදානයේ හම්බන්තොට යාවජීව කැන්වසින් සාමාජිකයින්ම වූයේ ඇයි???

නිල ඇඳුම

2010-08-25T00:28:00.000-07:00

නිල ඇඳුම ලෙස නිකම් ලැබෙන මෙලොව් රහක් නොමැති කුරුල්ලා සහිත නිල් කමීසය මිලදී ගත හැකි බව අපට දන්වනු ලැබ තිබේ....

*ශ්‍රී ලංකා ටෙලිකොම් ආයතනයේ ප්‍රමිතිවලට අනුකූලව වැඩ කිරීම සඳහා අපි නිල ඇඳුම් මිලදී ගෙන ඇඳිය යුතුද????

*අප හා සමාන්තර සේවකයින් හට මුලු ඇඳුමම ලැබෙන්නේ අප ඇන්දීම සුදුසු කමීස පමනක්ද????

*සිටින 1000ක් වැනි මෑන්පවර් සේවකයින්ට නියම තත්වයේ වැඩකට ඇඳිය හැකි මට්ටමේ කමීසයක් දීමට නොහැකි තරම් ශ්‍රී ලංකා ටෙලිකොම් ආයතනය බන්කොලොත් වී ඇතිද???

ඔබ මෑන්පවර් සේවකයෙක් වෙයි නම් ඔබ විසින් මෙම මහඟු අවස්තාව ඔබේ කම්කරු සේවයේ,,මඩගොවිතැනේ,,පිරිසිදු කිරීමේ,,සහ යාචක රැකියාවෙ යෙදෙන අයට කමීස මිලදී ගැනීම සඳහා මිස
මුදල් දී ආයතන නාමයක් එල්ලාගෙන යාමට භාවිත නොකරන මෙන් ඉල්ලා සිටිමු....

ඩෝසර බෙදීම

2010-08-08T05:53:00.000-07:00

ශ්‍රී ලංකා ටෙලිකොම් මූලස්තාන ශාඛාවේ හරි අපූරු උත්සවයක් පසුගිය දිනෙක පැවැත්විනි...එනම් උතුරු වසන්තය වැඩසටහනේ ටෙලිකොම් වැඩසටහන් සඳහා ඩෝසර් රථයක් පරිත්‍යාග කිරීමේ උත්සවයය්..ප්‍රධාන විධායක නිලධාරී මහතාගේ සුරතින් ඒ හා සම්බන්ධ මහත්වරුන් කීප දෙනෙකුගේ මැදිහත්වීමෙන් ඩෝසර රථය පනගැන්වෙන ලදී....
අපට ඇති ප්‍රශ්ණ අංක වශයෙන් දක්වමු...

1. උතුරු වසන්තය ව්‍යාපෘති අවසන් අදියර වල පවතිනවිට ඩෝසරයක් මිලදී ගන්නේ ඇයි....

2. නඩත්තු කටයුතු කේබල ඇදීමේ සිට නව සබඳතා පවා දීගත නොහැකි මට්ටමට භෞතික හා මානව සම්පත් හිඟතාවයක් පවතිනවිට ඩෝසරයක් දීමෙන් පමණක් වැඩ කල හැකිද????

3. කොම්ටෙක්(comtec system pvt ltd) හා සියෙරා(sierra construction Ltd) යන සමාගම්වලට උතුරු වසන්තය ව්‍යාපෘති සහ නඩත්තු කටයුතු නීත්‍යානුකූලව කොටස් වශයෙන් ලබාදී ඇති විට ටෙලිකොම් ආයතනය ඩෝසරයක් ගෙන කිරීමට නියමිත ව්‍යාපෘති මොනවාද???(කුඩා ප්‍රමාණයේ කේබල මීටරයක් ඇදීමේ කොන්ත්‍රාත් සේවාගාස්තුව(unit rate contract price per meter) පමණක් මීටරයට රුපියල් 100කට ආසන්න අගයක් ගනී.

4. පාලනාදිකාරිය පවසන පරිදි සමාගම පාඩු සහිතව ගමන් කරන්නේ නම් ඉතා සුලු නඩත්තු කටයුතු වලට ඩෝසරයක් පැයකට දෙකකට කුලියට ගැනීම වෙනුවට ඩෝසරයක් මිලදී ගන්නේ ඇයි??

අලුතින් මිලදීගන්නා සහ ඔහේ දිරමින් පවතින මොන්ටේරෝ,,වොල්වෝ,,ප්‍රාඩෝ වලට වඩා ඩෝසරයක් ගැනීම වටී..එහෙත් කරන්නට වැඩක් නැත්නම් ඩෝසරයෙන් කිනම් පලක්ද....මේ නරි නාටක අවසන සිදුවන්නේ අලාභ දරාගත නොහැකි ටෙලිකොම් සමාගම නියාමන කොමිසම හරහා මිල පාලනය කර ජනතාවට ලැබෙන්න තියෙන සහන පාරත් කපා දැමීම හැර වෙන කුමක්ද???

ස්කයි නෙට්වර්ක්(Sky Network)

2010-08-01T04:33:00.000-07:00

වයි මැක්ස් කියන තාක්ශනය ඔස්සේ රැහැන් රහිත අධිවේගී ඉන්ටර්නෙට් තාක්ශනය හඳුන්වාදෙන්න කියල නැකැත් බලල දැන් අවුරුදු 2ක් විතර ඒත් තාම ඒ ව්‍යාපෘතිය නමින්ම කියනව වගේ ස්කයි නෙට්වර්ක්(Sky Network) වෙලා ඉවරයි...රජයට සම්බන්ධ ඉහලම පෙලේ පුද්ගලයකු සම්බන්ධ වුනු ස්කයි නෙට්වර්ක් ආරම්භ කරන්නේද විශාල මගඩියක් ගෙනහැර පාමින්..එය ගැන විස්තර ලංකා ඊ නිවුස්(Lanka e news) හරහා පලවූ නිසා යලිත් පැවසීම වැඩක් නැතිවෙයි කියල මම හිතනව...
ස්කයි නෙට්වර්ක් තාම පටන්ගන්න නැතිවෙන්න හේතුවක් විදිහට ඇතුලෙ අය දකින්නෙ තාක්ශනික දෝශ සහිත අඩු විභවයකින් යුතු උපකරණ ආනයනය කිරීම....
අපි ටිකක් බලමු මොකක්ද මේ වයි මැක්ස්(wi Max) කියන්නෙ කියල..දැන් ඔයාල දන්නව ටෙලිකොම් එකෙන් ඒඩී එස් එල්(ADSL-Asymetric Digital Subcriber Line) කියන තාක්ශනය හරහා නිවාස සහ වානිජ අවශ්‍යතා සඳහා ඉන්ටර්නෙට් ලබාදෙනව...ඒත් කේබල් ප්‍රශ්ණ(cable problems)...හුවමාරු මධ්‍යස්තාන ධාරිතාව(Switching capacity),ජාලගත ධාරිතාව(Network comfortability) වාගෙ බොහෝ ගැටලු නිසා ටෙලිකොම් සමාගමට ලන්කාවෙන් අටෙන් එකකටවත් ඒ ඩී එස් එල් පහසුකම දෙන්න විදිහක් නෑ...ඒකට විසඳුමක් විදිහට ටෙලිකොම් සමාගම වයර් රහිත තාක්ශනයක් සහිත වයි මැක්ස් කියන තාක්ශනික ක්‍රමවේදය කරා යොමුවෙනව..එතකොට ටවර් එකක සිට කිලෝමීටර 10-15ක ඈතින් හිටියත් යස අගේට ඉන්ටර්නෙට් යන්න පුලුවන් කියල තමා පොතපතේ ඔය තාක්ශනය ගැන තියෙන්නෙ..
මේ වාගෙ තාක්ශනයක් හඳුන්වාදෙන්න උවමනාව තිබුනත් ඒ වෙනකොට ටෙලිකොම් සමාගමට ටී ආර් සී(Telecommunication Regulation Commission) එකෙන් ඒ සඳහා බලපත් ලැබී තිබුනෙ නෑ...ඉතින් කපටි නුවනක් තිබුනු ඒ කාලෙ ටෙලිකොම් අධ්‍යක්ශ මන්ඩලය හා ටෙලිකොම් සභාපතිනිය ජනාධිපතිතුමා ගේ නෑ වෙන කෙනෙකුට කලින්ම කොම්පැනියක් හදන්න කීවා...ඊට පස්සෙ රජය මාර්ගෙන් අර කියපු කොම්පැනියට වයර් රහිත අන්තර්ජාල පහසුකම (Wireless Broadband)හා සම්බන්ධ බලපත්‍රය ලබා දෙනව....දැන් තුන්වෙනි අදියර විදිහට අර කොම්පැනිය ටෙලිකොම් සමාගමට අනුයුක්ත කරගන්නව....කිසිම ආකාරයක ලාභයක් නොලබපු කොම්පැනියක් ව්‍යාපෘතියේ 60%ක ලාභ ඔවුන් සතුවන පරිදි ස්කයි නෙට්වර්ක් නමින් ටෙලිකොම් සමාගමට අනුයුක්ත වන්නෙ අන්න එහෙමයි..
ඉතින් ඔය බයිල සන්දර්ශනේ ඉවර වෙලා කීවෙ පහුගිය අවුරුද්දෙ ජූලි මාසෙ වෙනකොට ටෙලිකොම් එකට ස්කයි නෙට්වර්ක් හරහා වය් මැක්ස් දෙන්න පුලුවන් කියල...ඒත් දැන් අවුරුද්දක් තිස්සෙ සද්දෙ විතරයි තාම හඳුන්වාදුන්නු ස්කයි නෙට්වර්ක් වයි මැක්ස් එකක් නෑ...කලින් පරීක්ශන සඳහා විශේෂයෙන් ආනයනය කරපු ඇල්කටෙල්(Alcatel) වාගෙ යුරෝපීය සමාගම්වල උපකරන කිලෝමීටර 20 කදිත් ඉහල තත්වයක සම්බන්ධතාවයක් පෙන්නුම් කලත් දැනට චීනෙන් ගෙනාපු හුවාවේ(Huawei) බඩුවලට කිලෝමීටර 3ක ප්‍රමාණයක්වත් කවර් කරගන්න බෑ කියල තමා කියන්නෙ...
ඕකට එක හේතුවක් තමා ටෙලිකොම් සමාගම තාමත් ඕනෑම උපකරනයක් මිලදී ගැනීමේදී ඉහලම තත්වය වෙනුවට භාවිතා කරන්නේ අඩු මිල කෙසේ හෝ වැඩ කියන තියරි එක.....සීඩීඑම් ඒ,ටෙලිෆෝන්,කේබල,අනෙක් උපකරන ආදී බොහොමයක් ටෙලිකොම් මඟින් ගෙන්වන උපකරනවල ඔය කියන ලෝකොලටි කියන දෝශය තියනව....චීන සමාගම්වල උනත් යුරෝපීය වෙළඳපොලට නිශපාදනය කරන ඉතා ඉහල තත්වයේ උපකරන තිබුනත් අපේ ලන්කාවට එන බොහොමයක් උපකරණ ඔවුන්ගේ පරීක්ශණ වලින් අසමත් වෙන ඒව කියල තමයි,,,අපේ සමහර ඉන්ජිනේරු මහත්වරු කියන්නෙ...නැත්නම් මොකද සීරෝ කරගන්නම මාර අමාරු ෆෝල්ට් තොගයක් එකපාර ටෙලිකොම් එකට එන්නෙ...දිනපතාම????

CDMA

2010-07-24T06:03:00.000-07:00

කලින්ම සී ඩී එම් ඒ හඳුන්වා දුන්නෙ ටෙකොම් නොවේ..සිය අතවැසියන් සේවකයන් ලෙස බඳවාගැනීමට එවකට ජපාන පරිපාලනය අකමැති වූ නිසා රජයේ 50%ක කොටස් තිබියදීත් අපේ දි මු ඇමති සිටි කාලයේ ටෙලිකොම් ආයතනට පෙර සී ඩී එම් ඒ පහසුකම ලන්කාබෙල් සහ සන්ටෙල් සමාගම් වලට ලබාදුන්නා...ඉන්පසු කරලියට සිටිලින්ක් ලෙස පැමිණි සීඩී එම් ඒ පහසුකම එවකට අනෙක් සීඩීඑම් ඒ මිල දෙකම අභිබවා රුපියල් 18500ක් පමන උනා..ඉතින් ඒ තරම් ලොකු ගානක් උනත අපේ අය තාම ආන්ඩුවෙ කියල සී ඩී එම් ඒ ගත්ත...ඒත් අද ටෙලිකොම් සීඩීඑම් ඒ තියෙන ගොඩක් ගෙවල වලින් ටෙලිකොම් මහත්වරු එයාලගෙ අම්මලත් එක්ක බැනුම් අහනව..

ගොඩක් ගෙවල් වල තියෙන සීඩීඑම් ඒ ෆෝන් 7-8 පාර ක් සර්විස් කරන්න වෙලා..දිගින් දිගටම කැහි ගෑනි එපා හොටු එකක් දෙන්න කියල කට්ටිය මාරු කරන් ආවත් ඒ ෆෝන් වල දෝශ කොනක් කෙලවරක් නෑ...වෙලාවකට ඩිස්ප්ලේ..තව වෙලාවකට සවුන්ඩ්...නැත්නම් රින්ග්ස්..සිග්නල් පෙන්නනව කතා කරන්න බෑ,,,,ඇහෙන්නෙ නෑ..බැටරි නෑ..සමහරුන්ට දැන් ඔය සී ඩී එම් ඒ එක අරන් ටෙලිකොම් එකකට යනව කියන්නෙ අර ක්වාටර් කර්මේට ඉන්ශුවරන්ස් වාරික ගෙවන්න යනව වාගෙ වැඩක් වෙලා...එතින් ඒ ගියත් ටෙලිකොම් මහත්තයෙක් හරි අර මොකෙක් හරි කොල්ලෙක් හරි හම්බවෙලා කතා කොරන්න ලැබෙන්නෙ නෑ..

සිකුරිටිගෙ රැස්පට් බලල අර නොම්මරේකට කතාකොරල කියල එතන ෆෝන් එක දමල එන්න වෙනව...ලඟදි පියුම් කෙනෙක් වාගෙ එකෙක් ෆෝන් හදන්න ජන්ගම සේවෙට දැම්මත් උන් ගෙවල්වලට එනව හොරයි...ටෙලිකොම් එකෙන් ගෙනත් තියන්න කියල තමා කියන්නෙ...ඔව්වට අර ෆෝල්ට් දමන එකත් මහ විකාරයක් 1241 ට කතා කොරල කියන්නලු..ඉතින් අපේ හෑන්ඩ් ෆෝන් එකකින් හරි වෙන එකකින් හරි ගත්තම ඔය අංක වැඩකොරන්නෙ නෑ...මහලොකුවට මොබිටෙල් එකත් ටෙලිකොම් එකේලු..ඔය මොබිටෙල් එකකින්වත් ඔය 1241ට ගන්න බෑ...

ටැලිකොම් එකේ ෆෝන් එක කැඩුන නම් කොහොමද ඒකෙන් කෝල් ගන්නෙ කියල මම හිතන්නෙ ලොකු අයට තේරෙන්නෙ නැතිව ඇති..ඔය 1241 ට ගානක් කැපෙන්නෙ නෑ කිව්වට අපේ ගම්වල මිනිස්සු ඔය ෆෝල්ට් දමන්න විනාඩි ගනන් ඉන්න ෆෝන් එක දෙන්න කැමති නෑ...ඒ අය හිතන්නෙ ම ඒකටත් සල්ලි යනව කියල....

අනික් කොම්පැනිවලින් දීපු සී ඩී එම් ඒ ෆෝන් අපේ සිටිලින්ක් තරන් දෝස නෑ...ඩයලොග් ඒවයෙත් ඒ තරම් දෝසයක් නෑ...මම දන්න හත් අට පලකම ඩයලොග් ෆෝන් එක කීප වතාවක් බිම වැටුනත් යකා වාගෙ වැඩ...බ්‍රේක්ඩවුන් නැතිම තරන්...ඒකට සිටිලින්ක් වතුර ඩින්ගක් අතේ ගෑවිල කෝල් එකක් ගත්තත් හෙට ඒක උස්සන් ටෙලිකොම් යන්න වෙනව....

අපිට මේ ඔක්කොම කැඩෙන අජී හුවායි ඉසෙට් ටී ෆෝන් අරගෙන ලේසියෙන් නොකැඩෙන එකක් දුන්නනම් දෝස හදන්න වියදම් අඩුවෙනව මයෙ හිතේ...අපේ මහත්තුරු දෝස වැඩිවෙනකොට වැඩිගානක් ගෙවල හොඳ ෆෝන් එකක් අරන් දෙනව වෙනුවට කලේ පඟරනැට්ටො ටිකක් දම්මල ෆෝන් මාරු කරන්න දැම්ම...උන් කරන්නෙ ෆෝන් එකෙ වැඩ නැත්නම් ෆෝන් එකක්...ඩිස්ප්ලේ නැත්නම් ඩිස්ප්ලේ,,,බැටරි නැත්නම් බැටරි,,රිසීවරේ අවුල් නම් රිසීවර් විදිහට කෑලි මාරු කරන එක විතරයි,,,හදන්න දන්න අලබෝලයක් නෑ...ඔය ඔක්කොම තියෙන හොඳ එකක් පාරිභෝගිකයට දෙන එක හත් අට වතාවක් ෆෝන් ගෙන්නවට වඩා හොඳ කියල අපි හිතන්නෙ..

අපි කිව්වට එක ෆෝන් එකට එක කස්ටර්මර්ට ෆෝන් 7ක් ගේන්න බාල ෆෝන් වලට ටෙන්ඩර් 7ක් දමනකොට ටෙලිකොම් ලොකු මහත්වරුන්ට ලැබෙන කොමිස් නැති උනාම ගොඩක් අප්සට් නිසා මේව වෙන එකක් නෑ කියල අපි හිතන්නෙ....
ඉතින් මේව බලන අය දන්න කියන තැනක මේතාක් වසරකට වඩා කාලයක් නොකැඩී තිබුන ෆෝන් සිටිලින්ක් එකක් තියනවනම් එයා පුදුම වාසනා මහිමයක් තියෙන කෙනෙක් විදිහට අපිට හඳුන්වන්න පුලුවනි...

තව එකක් කට්ටිය සිටිලින්ක් දෙනකොට ඉන්ටර්නෙට් යන්නත් පුලුවනි කියල තමා දුන්නෙ..ඒත් ඒකෙන් ඉන්ටර්නෙට් ගිහින් බලනවට වඩා ලේසියි ඉබ්බෙකුගෙ පිටේ නැගල ටවුමට ගිහින් රුපියල් 100ක් දමාගෙන HSDPA මොඩම් එකෙන් ඉන්ටර්නෙට් යන එක..ඒ තරම් අසහාය ස්පීඩ් එකක් සිටිලින්ක් නෙට් වල තියෙන්නෙ...